Беларус Мікалай Весялоў выйшаў у трэці круг чэмпіянату свету па боксе

Пасля пяці дзён 15-га чэмпіянату свету па боксе, які праходзіць у італьянскім Мілане, выступ працягваюць чацвёра беларускіх баксёраў. Як інфармуе БЕЛТА, 5 верасня на рынг выходзіў толькі адзін з нашых суайчыннікаў. Мікалай Весялоў (75 кг) атрымаў другую перамогу на сусветным форуме, упэўнена перамогшы эквадорца Хайме Картэса — 18:6. У трэцім крузе сапернікам беларускага баксёра стане кітайскі спартовец Чжан Цзяньцін (8 верасня).

6 верасня свае паядынкі правядуць два прадстаўнікі Беларусі. Магамед Нурудзінаў (69 кг) у сустрэчы другой стадыі пазмагаецца з грузінам Кахаберам Жванія. Рамазан Магамедаў (да 91 кг) сустрэнецца са славацкім баксёрам Сандра Дзірнфельдам.

7 верасня віцэ-чэмпіён афінскай Алімпіяды-2004 Віктар Зуеў (звыш 91 кг) у другім крузе будзе сапернічаць з харватам Марка Тамашовічам.

Шэсць беларускіх баксёраў ужо завяршылі выступ на чэмпіянаце міру: Бата-Мунка Ванкееў (51 кг), Вазген Сафар'янц (60 кг), Сяргей Карнееў (81 кг),чэмпіён Еўропы-2002 Хаважа Хацыгаў (54 кг), Міхаіл Бернадскі (57 кг) і дэбютант зборнай Беларусі Міхаіл Бакатура (64 кг).

Агулам на чэмпіянат міру адправіліся 10 беларускіх баксёраў. Нашы суайчыннікі былі прадстаўленыя ва ўсіх катэгорыях, за выключэннем вагі да 48 кг.