Беларусь не можа збыць малочную прадукцыю на 400 мільёнаў долараў

Беларусь не знаходзіць рынкаў збыту для малочнай прадукцыі. На складах такой прадукцыі ляжыць амаль на 400 мільёнаў долараў. Пра гэта на нарадзе ў Аляксандра Лукашэнкі паведаміў прэм'ер-міністр Раман Галоўчанка, перадае БЕЛТА.

Малочныя запасы на складах ён патлумачыў найперш цэнавым фактарам на знешніх рынках, а таксама ростам прадукцыйнасці на галоўным рынку — у Расіі.

Галоўчанка спадзяецца на іншыя рынкі: "Але спецыялісты кажуць, што гэта не трагічна, з'ява часовая: цана на кітайскім і наогул на азіяцкім рынку пачала расці".

Лукашэнка ў адказ параіў шукаць іншыя рынкі і прапанаваў Зімбабвэ, куды нядаўна ездзіў віцэ-прэм'ер Леанід Заяц. Па словах намесніка прэм'ера, жыхары Зімбабвэ спажываюць у год 8 кг малака на чалавека, а беларусы — 350 кг.

"Ім дзетак няма чым карміць. І я паабяцаў, што мы (гэта не дабрачыннасць) ім дапаможам. Я да чаго: не толькі будзем чакаць, пакуль кошты ў суседзяў паднімуцца, гэта зразумела, але трэба ісці на іншыя рынкі. Трэба займаць гэтыя рынкі, і яны будуць з намі з задавальненнем супрацоўнічаць", — пракаментаваў Лукашэнка.