Беларус зрабіў "фота дня" для NASA
Галактыка Андрамеды / Дзмітрый Канановіч
Фотаздымак беларуса Дзмітрыя Канановіча стаў здымкам для амерыканскага касмічнага агенцтва NASA. Астрафатаграфія — яго хобі, якім ён захоплены з 2007 года. Наогул жа Канановіч — доктар хімічных навук.
Кожны дзень NASA на спецыяльнай старонцы публікуе розныя выявы або фатаграфіі Сусвету з кароткім каментаром прафесійнага астранома.
На здымку ад 13 лістапада — начное неба над заснежанымі Альпамі, і ў гэтым цёмным небе відаць вялікая спіральная галактыка — гэта галактыка Андрамеды.
"Вы калі-небудзь бачылі галактыку Андрамеды? Хоць няўзброеным вокам яна выглядае як слабая і невыразная кропля, узрост святла, якое вы бачыце, — больш за два мільёны гадоў. Гэта, мабыць, самае старажытнае святло, якое вы калі-небудзь бачылі", — тлумачыць аўтар фатаграфіі.
На фота Андрамеда знятая незадоўга да таго, як яна зайшла за Швейцарскія Альпы. Здымак зроблены ў пачатку мінулага года.
Яшчэ больш касмічных фатаграфій беларуса можна ўбачыць у яго Instagram-акаўнце.
