У Беларусі памілаваныя яшчэ 30 палітвязняў

У Беларусі памілаваныя яшчэ 30 палітвязняў. Адпаведны ўказ падпісаў Аляксандр Лукашэнка. У ім яны называюцца "асуджанымі за злачынствы пратэстнай накіраванасці". Прэс-служба Лукашэнкі піша пра "гуманны жэст у дачыненні да гэтых людзей", якія "атрымалі шанец вярнуцца да нармальнага жыцця, да сям'і і працы".

Сярод памілаваных палітвязняў 7 жанчын і 23 мужчыны. Як і ў мінулы раз, іх прозвішчы не называюцца. Адзначаецца, што большасць з іх з'яўляюцца бацькамі непаўналетніх і малалетніх дзяцей.

Сцвярджаецца, што справы гэтых людзей вывучала сумнавядомая камісія пад кіраўніцтвам генпракурора Андрэя Шведа (яна займаецца заявамі ад беларусаў, якія пакінулі краіну праз рэпрэсіі ці "рэабілітуе" спартсменаў у РБ). І яны нібыта напісалі хадайніцтвы аб памілаванні, прызналі віну і "далі абяцанне весці законапаслухмяны лад жыцця".

Папярэдні ўказ аб памілаванні 30 палітычных зняволеных быў падпісаны 16 жніўня. Імёны васьмі вызваленых палітвязняў дагэтуль невядомыя праваабаронцам.

У РБ налічваецца больш за 1300 палітычных зняволеных, прызнаных праваабаронцамі. Насамрэч іх значна больш.