Беларуса затрымалі ў Варшаве — яго падазраюць у падпалах

Грамадзяніна Беларусь затрымалі ў польскай сталіцы. Яго падазраюць у спробе падпалу аб'екта ў Гданьску, піша польскі тэлеканал TVP.

"Гэта чарговы арышт у межах расследавання дзейнасці арганізаванай злачыннай групы, якая на заказ замежных спецслужбаў здзяйсняла дыверсіі, у прыватнасці падпалы", — гаворыцца ў паведамленні Агенцтва ўнутранай бяспекі.

У затрыманага беларуса канфіскавалі прадметы, якія, паводле прадстаўніка агенцтва, маглі быць выкарыстаныя для дыверсій.

Падазраванага беларуса арыштавалі на тры месяцы. Пракуратура выставіла яму абвінавачанні па некалькіх артыкулах Крымінальнага кодэкса: удзел у арганізаванай злачыннай групе міжнароднага характару і здзяйсненне дыверсій і дыверсій тэрарыстычнага характару на заказ замежнай разведкі. Яму можа пагражаць пажыццёвае зняволенне.

У студзені і траўні гэтага года Агенцтва ўнутранай бяспекі затрымала грамадзян Беларусі, Польшчы і Украіны, якія, як мяркуецца, нясуць адказнасць за падпалы ў Гданьску, Гдыні і Марку. Іх падазраюць таксама ў падрыхтоўцы падпалу будынкаў у Вроцлаве.

Паводле інфармацыі крыніц BYPOL, беларусаў і паляка расійскія спецслужбы выкарыстоўвалі "ўцёмную" — за грошы ім замаўлялі выкананне на тэрыторыі Польшчы акцый, за здзяйсненне якіх пагражае крымінальная адказнасць.