Беларусу, які пранёс расійскі сцяг на Паралімпіядзе, падарылі кватэру ў Маскве
![Беларусу, які пранёс расійскі сцяг на Паралімпіядзе, падарылі кватэру ў Маскве](/sites/default/files/styles/gallery_main/public/2023-08/foma4kin-0310.jpg.webp?itok=DNPoukgn)
Чыноўніку Мінспорту Беларусі Андрэю Фомачкіну падарылі кватэру ў Маскве. Пра гэта паведаміла афіцыйная прадстаўніца МЗС Расіі Марыя Захарава ў сваім акаўнце ў Фэйсбуку.
Расійская чыноўніца напісала, што да яе звярнуўся "знаёмы знаёмага", які паведаміў: "Марыя, ведаеце, мяне так захапіў учынак беларуса Андрэя Фомачкін, які, нягледзячы на рашэнне міжнародных чыноўнікаў ад спорту, пранёс на адкрыцці Паралімпіяды ў Рыа расійскі сцяг, што я хачу падарыць яму кватэру. Дапамажыце, калі ласка".
Па словах Захаравай, яна ўжо бачыла гэтую кватэру ў гатовым доме. Імя спонсара і рэакцыю Фомачкіна расійская чыноўніца паабяцала паведаміць пазней. Яна дадала, што 2 кастрычніка Фомачкін прыехаў у Маскву.
На адкрыцці Паралімпіяды ў Рыа беларускі спартовы функцыянер Андрэй Фомачкін Выйшаў з расійскім сцягам. Гэтым ён парушыў рашэнне Міжнароднага Алімпійскага камітэта, які адхіліў расійскую зборную ад Гульняў за ўжыванне допінгу. Фомачкін быў пазбаўлены акрэдытацыі на Паралімпіядзе. Яго ўчынак ухваліла кіраўніцтва Беларусі і Расіі. Сярод спартоўцаў думкі наконт учынку Фомачкіна падзяліліся.