Больш чым траціна беларусаў лічыць, што грошы лепш захоўваць "пад матрацам"
![Беларусы чакаюць далейшага росту цэн / pixabay](/sites/default/files/styles/gallery_main/public/2023-08/coins-1015125_1920.jpg.webp?itok=iNqqNzJ5)
Беларусы чакаюць далейшага росту цэн / pixabay
Нацыянальны банк расказаў пра інфляцыйныя чаканні беларусаў. Паводле дадзеных рэгулятара, адчуваны ўзровень інфляцыі ў лістападзе склаў 10,1%. У параўнанні са жніўнем паказчык крыху знізіўся — на чатыры працэнтныя пункты.
Толькі 18,4% беларусаў у лістападзе лічылі, што цэны выраслі нязначна, а 35,8% — што выраслі вельмі моцна. Астатнія адчулі "ўмераны рост цэн".
16% беларусаў лічаць, што цэны будуць расці павольней, чым цяпер. 59,6% — што будуць расці гэтак жа інтэнсіўна, а 21,6% чакаюць больш прыкметнага падаражэння тавараў.
Большасць беларусаў (68,8%) лічыць, што цяпер неспрыяльны час для буйных пакупак. У крэдыт купляць вялікія пакупкі лічаць дрэннай ідэяй 77,1% грамадзян. Абодва паказчыкі выраслі ў параўнанні са жніўнем.
Павялічваецца колькасць тых, хто аддае перавагу захоўванню грошай у валюце (84,8% у лістападзе супраць 84,2% у жніўні). Нарэшце, прыкметна вырасла колькасць беларусаў, якія лічаць, што грошы трэба захоўваць наяўнымі — такіх амаль 35%. На другім месцы — нерухомасць, на трэцім — золата. Нарэшце, толькі 8,9% грамадзян давяраюць банкаўскім укладам.
Дадзеныя Нацбанка па інфляцыйных чаканнях адлюстроўваюць не эканамічную статыстыку, а тое, як грамадзяне адчуваюць на сабе рост цэн, і іх чаканні. Такім чынам, можна казаць пра тое, што ў цэлым большасць беларусаў песімістычна глядзіць на будучыню нацыянальнай эканомікі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.