Цэны на таксі вернуцца да нормы? Разбіраемся, што адбываецца на рынку перавозак

06/11/2024 - 17:11

Што адбываецца з таксі ў Беларусі / "Яндекс"

З 1 лістапада перавозчыкаў таксі абавязалі ўступіць у створаны ўладамі "Рэестр аўтамабільных перавозак пасажыраў у нерэгулярных зносінах".

Там будзе ўтрымлівацца інфармацыя аб усіх удзельніках рынку: кіроўцах, дыспетчарах, кампаніях. Хто ў гэты рэестр не трапіў, будзе лічыцца нелегалам.

У першы ж дзень работы новага правіла цэны на таксі ўзляцелі да нябёсаў, а час чакання машын моцна павялічыўся.

Еўрарадыё паспрабавала разабрацца, што зараз адбываецца на рынку таксі ў Беларусі.

"Выдатнае паляпшэнне, вельмі падабаецца"

1 лістапада беларусам было праблемна выклікаць таксі. Людзі скардзіліся, што за звыклы маршрут давялося плаціць у 2-3 разы больш чым звычайна. Павялічыўся і тэрмін чакання.

Вось што пісалі чытачы "Анлайнера":

— У панядзелак, 28 кастрычніка, без павышальных каэфіцыентаў паездка з Серабранкі да Усходу на тарыфе "Камфорт" каштавала 14 рублёў. Зараз праверыў — 21 рубель на "Эканоме" без павышальных каэфіцыентаў. Час і надвор'е прыкладна аднолькавыя. Выдатнае паляпшэнне, вельмі падабаецца.

Цены на такси вернутся к норме? Разбираемся, что происходит на рынке перевозок

Цэны на таксі моцна павысіліся з 1 студзеня / odelax.ru

Складанасці з выкліканнем таксі адчулі і жыхары рэгіёнаў:

— Я жыву ў Мар'інай Горцы. Таксі выклікалася як звычайна, а вось кошт вырас на 2 рублі.

У чым жа справа? Здаецца, у тым самым рэестры. Як піша БелТА, 5 лістапада ў рэестр уключыліся 62% ад агульнай колькасці кіроўцаў у краіне.

Дык што ж гэта за рэестр? Па сутнасці, гэта база дадзеных перавозчыкаў з поўнай інфармацыяй пра іх. Па словах старшыні Асацыяцыі прафесійных перавозчыкаў Кацярыны Станкевіч, рэестр быў створаны "ў мэтах узмоцненай увагі і кантролю з боку кампетэнтных органаў" за таксі-перавозчыкамі.

Яна прыводзіць рэгулярныя зводкі навін, дзе часта згадваюцца ДТЗ з удзелам таксі.

Паводле яе слоў, рэестр дапаможа змагацца з нелегальнай міграцыяй, бо "многія кіроўцы не ведаюць рускай мовы, і было немагчыма папрасіць іх адкрыць багажнік або спыніцца ў патрэбным месцы".

Акрамя таго, Станкевіч выказала прэтэнзіі да "найбуйнейшага перавозчыка", відавочна намякаючы на "Яндэкс". Яна сцвярджае, што кампанія "грэбуе базавымі нормамі і правіламі", ад чаго значная частка рынку перайшла ў шэрую зону, дзе перавозчыкі і кіроўцы злоўжываюць правамі на шкоду інтарэсам пасажыраў, іншым таксістам і дзяржаве агулам.

Адзін з кіроўцаў таксі, з якім пагаварыў "Смартпресс", расказаў, што тэрмін чакання вырас у 2-2,5 разы, цэны таксама павялічыліся ўдвая.

— Аўтапаркам давялося аформіць кіроўцаў афіцыйна, па дамове. Прыйдзецца плаціць падаткі.

"Высокія цэны будуць збіваць попыт"

На думку старшай навуковай супрацоўніцы эканамічнага цэнтра BEROC Анастасіі Лузгіной стварэнне рэестра аўтамабільных перавозак пасажыраў у нерэгулярных зносінах звязана з упарадкаваннем дзейнасці таксі.

— Шэраг людзей, якія падпрацоўвалі ў тым жа "Яндэксе", цяпер не змогуць легальна працаваць. І, вядома, у выніку пацярпеў звычайны спажывец. Напрыклад, калі ўзяць Uber у заходніх краінах, там жа таксама не працуюць прафесійныя таксісты: ты проста можаш уключыць мабільную праграму і падвезці чалавека. Таму такія жорсткія патрабаванні абмяжоўваюць магчымасці падпрацоўкі і звужаюць магчымасці людзей, якія хацелі проста падпрацаваць.

Што тычыцца цэн, то экспертка сцвярджае, што рынак будзе прыстасоўвацца і ўрэшце цэны знізяцца.

— Людзі не чакалі, што цэны так моцна падскочаць, і былі вымушаныя купляць гэтыя паслугі. Але ў будучыні высокія цэны будуць збіваць попыт на таксі. І, цалкам магчыма, калі рынак прыстасуецца і зразумее, як працаваць у новых умовах, цэны нармалізуюцца. Тут можна прыгадаць цанавое рэгуляванне, якое можа паўплываць на гэта. Скажуць не завышаць цэны — значыць не будуць завышаць, альбо вызначаць нейкія межы. Безумоўна, першапачатковы скачок знізіцца за кошт таго, што не будзе попыту — людзі проста не будуць карыстацца таксі.

"У дзяржавы скончыліся грошы"

Эканаміст Валянцін Сакалоўскі бачыць у стварэнні рэестра тры прычыны, кожная з якіх, з ягоных слоў, вельмі важная.

— Па-першае, у дзяржавы скончыліся грошы. Бюджэт дэфіцытны, і ў дзяржавы заўсёды былі падазрэнні, што таксісты не даплачваюць. Асабліва гэта ўзмацнілася з прыходам агрэгатараў: Uber, а потым "Яндэкса". Таму што вельмі шмат людзей, якім нельга працаваць у таксі (напрыклад, супрацоўнікі МНС або міліцыі), сталі там працаваць. Плюс людзі, для якіх таксі — гэта не галоўны від заробку, яны там могуць працаваць па 2-3 гадзіны літаральна. Таму ўлады вырашылі навесці тут парадак.