Больш за 30 краінаў запатрабавалі ізаляваць РФ і Беларусь ад міжнароднага спорту
Гучаць заклікі прыпыніць членства Мінска і Масквы ва ўсіх спартыўных федэрацыях / Ілюстрацыйнае фота pixabay.com
Больш за 30 краінаў патрабуюць максімальна ўзмацніць жорсткасць спартыўных санкцый у дачыненні да Расіі і Беларусі. Сумесная заява апублікаваная на сайце Дзярждэпартамента ЗША. Гаворка ідзе пра прыпыненне членства нацыянальных органаў кіравання спортам Расіі і Беларусі ва ўсіх міжнародных спартыўных федэрацыях. Акрамя таго, прапануецца адхіліць усіх асобаў, звязаных з Масквой ці Мінскам, ад пасадаў у міжнародных спартыўных арганізацыях. Яшчэ адна прапанова тычыцца прыпынення трансляцыі спартыўных спаборніцтваў для Расіі і Беларусі.
Гэтую заяву падтрымалі ўлады Аўстраліі, Вялікабрытаніі, Канады, ЗША, Японіі, а таксама большасці краін ЕС. Не падтрымалі заклік Балгарыя і Венгрыя, паведаміў раней міністр спорту Польшчы Каміль Бартнічук.
Нагадаем, надоечы санкцыі ў дачыненні да беларускіх і расійскіх спартсменаў увёў выканкам Еўрапейскага саюза настольнага тэніса.
