Брусельскі аэрапорт “Завентэм” часткова аднавіў працу пасля тэракту
Брусельскі аэрапорт “Завентэм”, зачынены пасля тэракту 22 сакавіка, часткова аднавіў працу раніцай у нядзелю, 3 красавіка. Першымі з аэрапорта вылятаюць рэйсы авіякампаніі Brussels Airlines у Фаро, Афіны і Турын.
Як перадае ВВС, на ўваходзе ў будынак аэрапорта будуць дзейнічаць узмоцненыя захады бяспекі: паліцыя плануе ажыццяўляць дагляд усіх пасажыраў і багажу.
Бельгійскія ўлады яшчэ ў пятніцу заявілі, што аэрапорт гатовы аднавіць працу, аднак адкрыццё затрымлівалася з-за страйку супрацоўнікаў паліцыі. Галоўнай умовай спынення акцыі пратэсту было ўзмацненне захадаў бяспекі на тэрыторыі аэрапорта.
Прадстаўнікі паліцэйскіх прафсаюзаў неаднаразова заяўлялі пра неадэкватны ўзровень бяспекі ў паветранай гавані. У прыватнасці, уваходы не былі абсталяваныя металашукальнікамі або дэтэктарамі выбухоўкі, нягледзячы на ўзмацненне бяспекі па ўсёй краіне.
22 сакавіка ў аэрапорце “Завентэм” і на станцыі метро “Маальбек” у Бруселі адбыліся тэракты. Яны забралі жыцці болей як 30 чалавек, яшчэ 250 асобаў атрымалі раненні.
Адказнасць за напады ўзяла на сябе экстрэмісцкая групоўка “Ісламская дзяржава”.
