"Чарговы прыклад безадказнай рыторыкі" — Дзярждэп ЗША пра планы РФ у Беларусі
ЗША хочуць прыцягнуць Расію да адказнасці / AP/Scanpix/LETA
У Вашынгтоне "рашуча асуджаюць" заяву Уладзіміра Пуціна пра планы размяшчэння ў Беларусі тактычнай ядзернай зброі. Пра гэта заявіў прадстаўнік Дзярждэпартамэнта Ведант Патэль. Паводле яго слоў, гэта "чарговы прыклад безадказнай ядзернай рыторыкі", якая назіраецца ад пачатку агрэсіі РФ супраць Украіны.
У руках ЗША ёсць шэраг інструмэнтаў "для прыцягнення Расійскай Федэрацыі да адказнасці", сказаў прадстаўнік Дзярждэпа. Аднак іх ён не назваў, піша golosameriki.com.
Пра планы размяшчэння ў Беларусі расійскай тактычнай ядзернай зброі Пуцін заявіў увечары 25 сакавіка. Ён лічыць, што Расія не парушае рэжыму яе нераспаўсюду, паколькі РБ не атрымае кантролю за ядзернымі зарадамі (пра гэта ж заявілі ў МЗС РБ). Захад жа бачыць пагрозу для бяспекі Еўропы і прагназуе новыя санкцыі.
Аляксандр Лукашэнка з каментаром дагэтуль не выступіў, але на пятніцу запланавана яго "пасланне".
