Да 1 ліпеня ў парламент плануецца ўнесці новы варыянт Кодэкса аб адукацыі
Да 1 ліпеня ў Палату прадстаўнікоў плануецца ўнесці новую рэдакцыю Кодэкса аб адукацыі. Пра гэта грамадскасці Магілёва распавёў міністр адукацыі Ігар Карпенка падчас сустрэчы ў дзяржаўным абласным інстытуце развіцця адукацыі, перадае БЕЛТА.
Міністр паведаміў, што цяпер ідзе праца па ўнясенні змяненняў у Кодэкс аб адукацыі. Па яго словах, дэпутатам ужо накіравалі новаўвядзенні, якія плануецца ўносіць у Кодэкс. Таксама Карпенка заклікаў настаўнікаў-практыкаў, спецыялістаў да абмеркавання гэтага дакумента.
Закрануў ён і тэму новых школьных падручнікаў:
Карпенка: "Прэзідэнт пры прызначэнні закранаў тэму падрыхтоўкі падручнікаў. Гэтая праца ўжо часткова пачатая. Недзе да канца 2020 года мы павінны цалкам забяспечыць усімі новымі падручнікамі сістэму агульнай сярэдняй адукацыі".
Карпенка падкрэсліў, што да гэтай працы прыцягваюцца настаўнікі-практыкі. Чыноўнік заявіў, што яму цікава, ці сапраўды справядліва адбываецца конкурсны адбор аўтараў навучальных дапаможнікаў, як настаўнікі-практыкі задзейнічаныя ў сістэме рэцэнзавання падручнікаў.
Міністр выказаў задавальненне тым, як арганізаваны ў школах шосты навучальны дзень. Ён распавёў, што сам неведваў навучальныя ўстановы, каб парверыць гэта. Аднак, на думку кіраўніцтва краіны, суботу ў школах трэба загрузіць элементамі працоўнага выхавання. Як гэта зрабіць, на думку Карпенкі, павінны падказаць практыкі.
Што да вышэйшай адукацыі, тут міністр следам за кіраўніком дзяржавы раскрытыкаваў сістэму тэстаў. Маўляў, абітурыент можа паспяхова здаць тэсты, падаць сертыфікаты, але што гэты абітурыент ўяўляе сабой як асоба? На думку Карпенкі, абітурыент мог выбраць тую ВНУ, дзе яму лягчэй прайсці па балах, а не мэтанакіравана атрымоўваць абраную прафесію.
