Да 55%: у якіх раёнах Беларусі больш за ўсё стратных прадпрыемстваў

09/04/2024 - 17:06

Дзе больш за ўсё стратных прадпрыемстваў?

Дзе больш за ўсё стратных прадпрыемстваў? / sb.by

Ці ведаеце вы, што 21% ад усіх прадпрыемстваў, якія працуюць у Беларусі (паводле звестак на студзень 2024 года) былі стратнымі? І гэта ўвогуле па краіне. А калі глядзець на сітуацыю па асобных раёнах, то месцамі атрымліваецца нашмат больш сумна. Ці, правільней казаць, дэпрэсіўна. Мы знайшлі раён Беларусі, у якім колькасць прадпрыемстваў, якія працуюць у мінус, перавышае 50%.

Усе яны, каб застацца на плаву, выпрошваюць грошы з бюджэту. Інакш кажучы — нашыя з вамі падаткі і прыбыткі паспяховых дзяржпрадпрыемстваў, якія маглі б пайсці на рамонт дарог і будаўніцтва школ і бальніц, сыходзяць на падтрыманне іх штаноў. "Эканамічны цуд" Лукашэнкі ва ўсёй красе.

Расказваем вам, у якіх рэгіёнах працуе больш за ўсё прадпрыемстваў, якія цягнуць эканоміку Беларусі на дно.

Хоцімскі раён. 55% прадпрыемстваў — стратныя

Абсалютны рэкардсмен у спісе раёнаў са стратнымі прадпрыемствамі — Хоцімскі. Самы ўсходні рэгіён Беларусі з насельніцтвам амаль 10 тысяч чалавек знаходзіцца ў Магілёўскай вобласці ля мяжы з Расіяй.

Сярэдні заробак у Хоцімскім раёне адзін з самых нізкіх у краіне — 1336 рублёў (пры сярэдняй па краіне 2025 рублёў). А агульная страта ўсіх прадпрыемстваў складае 49 тысяч рублёў.

Нягледзячы на такі стан рэчаў, тут рэгулярна адбываюцца карупцыйныя скандалы. У верасні мінулага года былога кіраўніка Хоцімскага раёна асудзілі за перавышэнне ўлады і атрыманне хабару. А ў снежні камунальнае прадпрыемства "Жылкамгас" праводзіла самавольную здабычу грунту-даламіту.

Бялыніцкі раён — 40%

Гэта таксама Магілёўская вобласць. Бялынічы — райцэнтр з насельніцтвам каля 17 тысяч чалавек. Прадпрыемствы раёна вырабляюць драўніну, кармы для жывёл, рапсавы алей.

Таксама ў Бялынічах знаходзіцца цэх па вытворчасці сыроў канцэрна "Бабушкіна крынка". Цалкам магчыма, што менавіта за кошт яго баланс прыбытку ўсіх арганізацый раёна застаецца станоўчым — 844 тысячы рублёў.

Але пры гэтым 40% прадпрыемстваў раёна — хранічна стратныя. Сярэдні заробак у рэгіёне раўняецца 1580 рублям.

Брэсцкі раён — 37,3%

Дзіўна, але менавіта гэты раён замыкае наш топ-3. Вы спытаеце: а як жа "Савушкін прадукт" або "Санта Брэмар"? Дык вось тут разглядаюцца толькі тыя прадпрыемствы, якія знаходзяцца за межамі горада Брэста.

У раёне працуе шмат сельскагаспадарчых прадпрыемстваў, якія, верагодна, і цягнуць эканоміку ўніз. Нягледзячы на велізарную долю стратных прадпрыемстваў, па агульным паказчыку арганізацыі раёна выйшлі ў плюс амаль на 2 млн рублёў.

У параўнанні з іншымі рэгіёнамі з нашага топу, тут прыкметна вышэйшы сярэдні заробак — 1824 рублі.

Іўеўскі раён — 35,3% стратных прадпрыемстваў

Наступны на чарзе — Іўеўскі раён Гродзенскай вобласці. Яго насельніцтва складае крыху больш за 20 тысяч чалавек. Тут вырабляюць сельгасабсталяванне, хімічныя прадукты, а таксама вырабы з дрэва і паперы.

Але прыбытку гэтыя арганізацыі раёну не прыносяць. Наадварот, іх сукупныя страты роўныя амаль 6 млн рублёў.

Высокай зарплатай тут таксама пахваліцца не могуць. У сярэднім жыхары Іўеўскага раёна атрымліваюць "бруднымі" 1360 рублёў.

Горад Жодзіна — 35,3%

І на пятым месцы — адзін з самых прамыслова развітых гарадоў Беларусі з насельніцтвам у 63 тысячы чалавек. Жодзіна знаходзіцца ў Мінскай вобласці, і ў першую чаргу вядомы заводам у вытворчасці кар'ерных самазвалаў "БелАЗ". Па звестках з адкрытых крыніц, там працуе каля 10 тысяч чалавек.

У горадзе таксама наладжаная вытворчасць святлодыёдных свяцільняў, дзіцячага адзення і трыкатажу.

Тым не менш, 35,3% прадпрыемстваў горада, гэта значыць больш за траціну, даюць страты. Але прамысловыя гіганты іх выцягваюць. Чысты прыбытак, які генеруюць прадпрыемствы Жодзіна, складае больш за 8 мільёнаў рублёў.

Ды і сярэдняя зарплата ў горадзе даволі прыстойная — 2284 рублі, а гэта на 13% вышэй, чым сярэдняя па Мінскай вобласці.