Экс-кіраўнік ГУБАЗіКа, які ў Мінску страляў у падлетка, стаў генералам

Экс-кіраўнік ГУБАЗіКа Андрэй Паршын, які ў Мінску страляў у падлетка, стаў генералам. Адпаведны ўказ у панядзелак падпісаў Аляксандр Лукашэнка.

Здарэнне адбылося ў чэрвені 2022-га каля жылога комплексу "Каскад". У кіраўніка Дэпартамента забеспячэння аператыўна-вышуковай дзейнасці МУС і былога начальніка ГУБАЗіКа Паршына здарыўся канфлікт з падлеткамі (па адной з версій, палкоўнік спрабаваў іх прагнаць з лаўкі каля пад'езда). Ён стрэліў у нагу аднаму з іх, 16-гадовага хлопца давялося шпіталізаваць. Сілавікі ў тг-каналах сцвярджалі, што зброя была траўматычнай.

Праз нейкі час бацькоў параненага падлетка прымусілі сказаць на відэа, што стральба ў іх сына была "правільнай рэакцыяй". Яны папрасілі прабачэння. Паршын за стральбу пакараны не быў. А цяпер ён ужо генерал-маёр міліцыі. Як бачым, стрэлы па падлетках не перашкаджаюць рабіць кар'еру ў лукашэнкаўскай сістэме.