Фестываль Вялікабрытаніі ў Мінску: з графіці, сідрам і асобным зборам смецця
![Фестываль Вялікабрытаніі ў Мінску: з графіці, сідрам і асобным зборам смецця](/sites/default/files/styles/gallery_main/public/2023-08/den_velikobritanii_16062018_tutby_brush_phsl-2880.jpg.webp?itok=hmp5KB8J)
23 чэрвеня ў Верхнім горадзе і на вуліцы Зыбіцкай у Мінску пройдзе вялікі брытанскі фестываль.
“Тое, што фестываль адбудзецца падчас Еўрапейскіх гульняў, — нават лепш для нас, таму што будзе шмат людзей у горадзе, прыедзе брытанская каманда — 150 чалавек — адна з самых вялікіх на гульнях”, — кажа амбасадарка Вялікабрытаніі ў Беларусі Фіёна Гіб падчас сустрэчы з журналістамі. Яна спадзяецца, што мінулагодні рэкорд па наведвальнасці фэсту — 50 тысяч чалавек — сёлета будзе пабіты.
Фэст падзеляць на 14 тэматычных зон з рознымі актыўнасцямі, фоталакацыямі, фудкортамі і музыкай: можна будзе пагуляць у рэгбі і вялікі тэніс, праверыць валоданне англійскай, паўдзельнічаць у стварэнні графіці на брытанскую тэму і нават паглядзець шоу робатаў і паказ калекцыі адзення брытанскіх дызайнераў.
На фудкорце будуць прадстаўленыя больш за 30 мінскіх рэстарацый, кожная з якіх прапануе па адной традыцыйнай брытанскай страве. Тут жа можна будзе выпіць піва і сідру.
Фішкай фестывалю стане тэма экалогіі. Па ўсёй фестывальнай пляцоўцы будуць размяшчацца кантэйнеры для асобнага збору смецця. Амбасада Вялікабрытаніі правядзе інтэрактыўныя экалагічныя майстар-класы.
Хэдлайнеры — маладыя брытанскія выканаўцы — Clean Kut Kid, Dan Owen, DJ Blaise, шатландцы Something’s Regenerated.
Па традыцыі Вялікі брытанскі фестываль адкрые шэсце валыншчыкаў. Пачатак шоу у 13:00.