Год калоніі на слова “дэбіл”: Беларусь першая ў Еўропе па колькасці зняволеных

25/07/2021 - 10:07

Беларусь першая ў Европе па колькасці зняволеных на 100 тысяч чалавек. У нашай краіне з кожных 100 тысяч чалавек 354 — зняволеныя. Такую статыстыку апублікавала стамбульская Акадэмія крымінальнага права.

На другім месцы — Турцыя (335 зняволеных на 100 тысяч). Трэцяе месца займае Расія (331 зняволеных на 100 тысяч).

Мапа па колькасці зняволеных / стамбульская Акадэмія крымінальнага права

У Ватыкане зусім няма зняволеных. У Сан-Марына толькі 6 чалавек на 100 тысяч насельніцтва, а ў Манака — 21.

Згодна з аглядам “Вясны”, на мiнулым тыдні беларусаў судзілі часцей за ўсё за абразу прадстаўнікоў улады, суддзяў, міліцыянтаў, прэзідэнта (арт. 368, 369, 391 КК).

У Буда-Кашалёве асуджаны на год калоніі Юрый Кавалёў за абразу прэзідэнта. Па звестках “Вясны”, крымінальную справу на мужчыну завялі за тое, што ён назваў Аляксандра Лукашэнку “дэбілам”.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.