ГУР Мінабароны Украіны сцвярджае, што ў Джанкоі знішчаны чатыры ЗРК С-400
Вайсковы аэрадром у Джанкоі пасля ўдару / twitter.com/ukraine_map/
ГУР Мінабароны Украіны сцвярджае, што ў Джанкоі знішчаны ці "крытычна пашкоджаны" чатыры пускавыя ўстаноўкі ЗРК С-400, тры радыёлакацыйныя станцыі, пункт кіравання сродкамі супрацьпаветранай абароны і апаратура назірання за паветранай прасторай "Падмурак-М". Паспяховая аперацыя Узброеных сіл Украіны на вайсковым аэрадроме ў акупаваным Крыме была праведзена 17 красавіка. Яго абстралялі ракетамі. Страты расійскай авіяцыі і асабовага складу яшчэ ўдакладняюцца.
На згаданым аэрадроме каля Джанкоя дыслакуюцца верталётны полк, тры авіяцыйныя эскадрыллі і СПА расійскай Паўднёвай вайсковай акругі. Расійскі бок традыцыйна пра страты змаўчаў.
Прэзідэнт Украіны Уладзімір Зяленскі падзякаваў вайскоўцам за "правільны ўдар па акупанту ў Джанкоі". Амаль уся батарэя C-400 коштам 500 мільёнаў долараў у Джанкоі была знішчана.
