Хто здаў КДБ Сцяпана Латыпава? Пад даносам — імя яго калегі-арбарыста з Масквы

30/04/2024 - 16:19

Сцяпан Латыпаў / https://huffingtonpost.fr/

У злітай "Кіберпартызанамі" базе зваротаў у КДБ Беларусі Еўрарадыё выявіла два даносы на абаронцу "плошчы Пераменаў" Сцяпана Латыпава. У першым гаворыцца, што беларус закупляў і ўвозіў у Беларусь забароненыя хімікаты. У другім — што ў яго ёсць "карта паляка" і што ён распальвае нянавісць да расіян.
Пасля затрымання ў верасні 2020 года дзяржканалы выпусцілі пра Латыпава прапагандысцкі сюжэт. Яму прыпісалі намер атруціць супрацоўнікаў міліцыі небяспечнымі хімікатамі.

Абодва даносы адпраўленыя ў адзін дзень ад імя Ігара Валер'евіча Казанцава з Масквы. Там жа можна знайсці расійскі нумар мабільнага тэлефона.
Мы знайшлі поўнага цёзку чалавека, які адправіў даносы. Як і Сцяпан Латыпаў, масквіч Ігар Валер'евіч Казанцаў — арбарыст (спецыяліст па догляду за дрэвамі). На яго зарэгістраваная гандлёвая марка "Русские арбористы".

Кто сдал КГБ Степана Латыпова? Под доносом — имя его коллеги-арбориста из Москвы

Арбарыст Ігар Казанцаў / Instagram

Мы патэлефанавалі па нумары, указаным у "базе даносаў". Слухаўку падняў Ігар Казанцаў. Вось якая размова ў нас з ім атрымалася.

— Добры дзень, гэта Ігар Валер'евіч?
— Слухаю ўважліва.

— Скажыце, а вы знаёмыя са Сцяпанам Латыпавым?
— На жаль, так.

— Ёсць інфармацыя, што вы паведамлялі КДБ Беларусі, нібыта Латыпаў увозіў у Беларусь праз Расію забароненыя хімікаты…
— З КДБ Беларусі я не супрацоўнічаў, таму што я знаходжуся ў Расіі і з'яўляюся рэзідэнтам Расіі. А супрацоўнікам КДБ Беларусі можа быць толькі грамадзянін Беларусі.

— Дык вы не пісалі ў КДБ, што ён мае "карту паляка" і распальвае міжнацыянальную варожасць?
— Гэта агульнавядомы факт, пра які ён пісаў у адкрытыя крыніцы інфармацыі. Без каментароў, у вас засталася літаральна пара хвілін.

— Вы ведаеце, што Сцяпана Латыпава пасадзілі на 8,5 года ў турму?
— Так, я пра гэта паінфармаваны.

— Як вы да гэтага ставіцеся?
— Я? Без каментароў.

— Вы хацелі, каб яго пасадзілі?
— Без каментароў.

— Як вы ставіцеся да таго, што вашы дадзеныя пазначаныя ў базе зваротаў у КДБ?
— Без каментароў.

— Чаму вы кажаце пра знаёмства з Латыпавым "на жаль"? Што здарылася?
— Таму што гэта вельмі непрыемны чалавек, таму кажу, што на жаль. Ён несумленны ў адносінах да калег, да навакольных яму асоб. Я занадта шмат ведаю пра яго.

— Ён вас чымсьці асабіста пакрыўдзіў?
— Без каментароў. Час выходзіць.

— Як грамадзянін Расіі вы маглі напісаць ліст у КДБ.
— Падкажыце, дзе напісаць. Я напішу, што ён прыдурак, баламутны, двурушны, і іншыя неэтычныя эпітэты.

— Дык вы пісалі ў КДБ ці не? Ёсць інфармацыя з вашымі адкрытымі дадзенымі.
— Іх не можа быць, бо я не пісаў. Час выйшаў.

***

Сцяпан Латыпаў стаў адным з сімвалаў мінскіх пратэстаў 2020 года. Упершыню ён трапіў на фота і відэа 13 жніўня, калі прывёз кветкі дзяўчатам у белым, якія выйшлі да Камароўскага рынку ў Мінску.

Латыпаў жыў на "плошчы Пераменаў". 15 верасня яго затрымалі, калі ён спрабаваў абараніць ад сілавікоў мурал. На ператрус у той жа дзень яго прывезлі збітым.

Падчас суда Латыпаў заявіў, што адміністрацыя турмы, каб дамагчыся прызнальных паказанняў, кінула яго ў так званую "прэс-хату". Пасля гэтага ён спрабаваў забіць сябе проста ў зале суда — седзячы ў клетцы, усадзіў сабе ў горла ручку.

16 жніўня 2021 года суддзя Аляксандр Воўк прысудзіў Сцяпану Латыпаву 8 гадоў і 6 месяцаў калоніі. На палітвязня пастаянна ціснуць. У канцы верасня 2022 года яго перавялі ў магілёўскую турму №4.

У пачатку сакавіка 2024 года стала вядома, што Сцяпан Латыпаў у турме захварэў на цынгу.