Звяжыцеся з маёй цешчай! Як беларусы вырашаюць сямейныя праблемы праз КДБ

30/04/2024 - 16:18

Даносы ў славу сямейных повязяў / @rubanau_collage

Вярнуць каханне, знайсці бацьку дзіцяці, праверыць каханка жонкі на дачыненне да тэрарызму — з такімі просьбамі беларусы і жыхары суседніх краін звярталіся ў КДБ Беларусі. Расказваем пра даносы на сваякоў, якія мы знайшлі ў базе, спампаванай "Кіберпартызанамі" з узламанага сайта "чэкістаў".

Пакараць сястру-аферыстку

Вясной 2016 года жыхар Санкт-Пецярбурга напісаў заяву аб пошуку ў Беларусі сваёй сястры. Нібыта яна знаходзіцца ў расійскім вышуку за махлярства, але "МУС Расіі, на жаль, працуе абы-як".

"Упэўнены, што яна і ў Беларусі ўжо шмат гора прынесла людзям. Пра сваякоў пішуць, што кінула — гэта якраз пра мяне і нашую маму. Поўная гісторыя не адзін ліст зойме пра ўсе яе злачынствы", — піша мужчына, нахвальваючы бяспеку ў Беларусі.

Аднавіць стасункі ў сям'і

Жыхар Полацка восенню 2016 года звярнуўся ў КДБ з незвычайнай просьбай. Мужчына папрасіў сілавікоў звязацца з цешчай, каб яна памірыла яго з жонкай і малалетнім сынам, з якімі ў яго склаліся дрэнныя адносіны.

Свяжитесь с моей тёщей! Как белорусы решают семейные проблемы через КГБ

Будынак Камітэту дзяржбяспекі / minsknews.by

“Пры неабходнасці гатовы даць вам больш поўную інфармацыю, якая мае дачыненне да гэтага звароту. P.S. Дапамажыце нам тром, калі ласка. У першую чаргу хачу, каб паміж мною, Марыяй і Колем стасункі зрабіліся нармальнымі і натуральнымі".

Праверыць почырк сведкі на завяшчанні

Жыхарка Заслаўя ў верасні 2018 года звярнулася ў КДБ, узяўшы пад сумнеў праўдзівасць завяшчання не так даўно памерлай маці. Жанчына папрасіла ў сілавікоў праверыць почырк на дакуменце, які нібыта супадае з манерай пісьма сведкі.

"Я не ведаю, што думаць. Сёння ў судзе падпісала міравое пагадненне, бо мяне маглі пасадзіць за суіцыд малалетняга сына, так сказала адказчыца. Я разгубленая і баюся, бо сутыкалася неаднаразова з тым, што міліцыя проста фабрыкуе звесткі. <...> Калі хто і зможа разабрацца, то толькі вы".

Знайсці бацьку дзіцяці

Непрыгожа паступіў са сваёй маскоўскай сяброўкай жыхар Жодзіна. Пара была ў адносінах восем гадоў, але афіцыйны шлюб не брала. А пасля нараджэння сына беларус раптоўна выпарыўся.

Праверыць каханка жонкі на дачыненне да тэрарызму

Жыхар Воршы, які працуе ў Расіі вахтавым метадам, падчас адпачынку выявіў, што ягонай жонцы ў скайпе незнаёмы піша прызнанні ў каханні.

"Мне 37 гадоў, я афіцыйна працую ў Расіі, 20 дзён дома — 40 дзён на вахце. Сёння быў першы дзень перавахтоўкі. Падняўся рана: вырашыў пагуляць у танкі, пакуль усе спяць: жонка і сынок трох гадоў. У раёне паловы на восьмую прыйшло паведамленне ў скайп, які быў адкрыты пад акаўнтам жонкі, што Мустафа Шахін у сетцы.

Калі б быў Валера Шахін, Коля, Пеця, то я б не звярнуў увагі і працягнуў бы забіваць у гульні свой час і зрок. Але імя Мустафа мяне насцярожыла, і калі я прачытаў перапіску з прызнаннем ад Мустафы ў каханні, пра разуменне, што без сексу жанчыне цяжка, у вачах замільгацела.

Адказы жонкі былі нешматслоўныя, але такую-сякую інфармацыю яна пра нашае жыццё і планы "зліла", асабліва да іх чапляцца сэнсу няма. Але вось працягласць апошняй размовы прывяла ў ступар — 52 хвіліны. Ён ведае, што ў яе ёсць акаўнт, пра яе профіль у "Аднакласніках", колькі часу мяне няма дома".

Урэшце засмучаны аршанец адправіў жонку з сынам да цешчы, а сам вырашыў звязацца з сілавікамі.

"Не ведаю, магчыма, гэта просты "фішар" (махляр) і працуе толькі дзеля грошай, але жонцы перад ад'ездам сказаў, што з пэўнай доляй верагоднасці гэта работнік ІДІЛ, аль-Нусра і гэтак далей, які можа захацець яе наведаць. Калі Вам цікава, вось яго нік у скайпе mostafa_shaheen2. Перапіску жонка ўжо спыніла".

Мой сын любіць Беларусь, адчапіцеся!

Маладога доктара з 5-й гарадской клінічнай лякарні КДБшнікі замучылі роспытамі пра тое, чаму ён ездзіць у Іспанію і чым там займаецца. Дапамагчы сыну вырашыць пытанні з сілавікамі вырашыла маці, якая напісала вясной 2016 года ліст у КДБ.

"Мой сын бывае ў Іспаніі падчас адпачынку. Бывае ў сваёй роднай маці, то-бок у мяне. А робіць тое, што робіць любы сын у мамы — адпачывае. У нас паважаная інтэрнацыянальная сям'я. Мой муж — грамадзянін Іспаніі, інспектар паліцыі на пенсіі.

Вашы супрацоўнікі ўжо падрабязна распыталі яго аб нашай сям'і. Мы паставіліся да гэтага з разуменнем. Гэта ваша праца. Але ўчора майму сыну адмовіліся даць даведку ў ваенкамаце для аўташколы.

Мой сын мае адтэрміноўку, бо знаходзіцца на ўліку ў анколага праз небяспечныя новаўтварэнні. Майго сына зноў абвінавацілі ў паездках у Іспанію. Сказалі, што ён не любіць Беларусь, дрэнна выказваецца пра краіну, ім цікавіцца ваша ведамства — і што пасля наступнай медкамісіі яго месца ў штрафбаце. Наша сям'я ў шоку ад гэтай несправядлівасці.

Мой сын не цікавіцца палітыкай, хоча жыць у Беларусі, даглядае састарэлую бабулю, любіць сваю прафесію. Чаму такое стаўленне толькі таму, што ў нас інтэрнацыянальная сям'я? Таму што я жыву ў Іспаніі. Калі ў вас ёсць пытанні да мяне, калі ласка, задавайце. Мы сумленныя людзі. І нам няма чаго ўтойваць".

Завербаваць свайго брата і былую жонку

Беларус, які пражывае ў расійскім Северадзвінску, раззлаваўся на свайго малодшага брата і былую жонку. Сваякі нібыта без яго ведама пачалі здаваць сямейнае жыллё ў горадзе Орша ў арэнду літоўцам. Мужчына вырашыў паквітацца з імі, напісаўшы данос у КДБ з цікавай прапановай.

"Вельмі я рэкамендую проста ўзяць іх "пад падпіску" і абодвух "завербаваць" як вашых платных інфарматараў. Думаю, што гэта будзе вельмі і вельмі карысна і для Рэспублікі Беларусь, і маім сваякам".