Кіраўнік УПЦ: У Пуціна ўсяліўся д’ябал

“З вялікім шкадаваннем павінен цяпер сказаць галосна, што сярод уладароў гэтага свету, якія па факце хрышчэння адносяцца да Праваслаўнай Царквы, з’явіўся сапраўдны новы Каін — не па імені, але па справах. Справы гэтыя сведчаць, што памянёны ўладар, як і першы ў гісторыі братазабойца Каін, трапіў пад дзеянне сатаны”, — сказана ў заяве Філарэта, якая размешчаная на афіцыйным сайце УПЦ.

Філарэт абвінаваціў Пуціна ў двух вялікіх грахах — забойстве і хлусні, а таксама падкрэсліў, што “начальнікам і натхняльнікам абодвух з’яўляецца д’ябал”.

“Менавіта па ягонай волі сродкі масавай інфармацыі ачоленай ім краіны ўдзень і ўначы на многіх мовах свету распаўсюджваюць цынічную хлусню аб Украіне, сеюць варожасць супраць украінскага народу, супраць нашага памкнення быць незалежнымі і будаваць уласную суверэнную дзяржаву, правакуюць кровапраліцце і забойствы ў Данбасе. Сам ён кажа шчырую і яўную хлусню: арганізуючы і дасылаючы ў нашу краіну забойцаў-наймітаў — кажа пра “ўнутраны канфлікт”, да якога ён нібыта не мае дачынення; накіроўваючы ва Украіну падначаленыя яму войскі — паўсюль публічна заяўляе, што гэтых войскаў няма”, — заяўляе кіраўнік украінскай праваслаўнай царквы.

На думку Філарэта, менавіта на расійскім прэзідэнце ляжыць найбольшая віна за гібель людзей на ўсходзе Украіны.

“У ягонай волі і ўладзе — неадкладна спыніць смерць і кровапраліцце, але ён дзеля пыхі сваёй працягвае памнажаць зло. Ён называе сябе братам украінскага народу, але насамрэч ён па справах сваіх сапраўды стаў новым Каінам, праліваючы братэрскую кроў і хлуснёй аплятаючы ўвесь свет”, — цытуе заяву Філарэта УНІАН.