Косава ўводзіць візавы рэжым для Беларусі
А таксама для яшчэ 86 краін свету. Пра гэта на сваёй старонцы ў твітары паведаміў кіраўнік косаўскага МЗС Энвер Хаджай.
Паводле яго словаў, візавы рэжым дапаможа абараніць Косава ад гандлю людзьмі і нелегальнай міграцыі.
Як інфармуе "Интерфакс-Запад", для ўезду на тэрыторыю гэтай дзяржавы візы мусяць атрымаць грамадзяне такіх еўрапейскіх краін, як Беларусь, Украіна, Расія, Малдова, а таксама жыхары шэрагу азіяцкіх і афрыканскіх дзяржаваў, уключна з Егіптам, Індыяй, Кітаем, Пакістанам і Інданэзіяй.
Нагадаем, Косава — сербскі аўтаномны край, населены албанскай большасцю, у 2008 годзе ў аднабаковым парадку аб'явіў незалежнасць ад Белграда. Яго незалежнасць ужо прызналі некалькі дзясяткаў краін Еўропы, арабскага свету, а таксама ЗША, Аўстралія і Новая Зеландыя. Беларусь, Сербія і Расія не прызналі незалежнасць Косава.
