Крэмль пракаментаваў магчымасць размяшчэння ядзернай зброі ў Беларусі
У Крамлі разглядаюць розныя варыянты адказу на размяшчэнне ўзбраенняў NATO каля расійскіх межаў. Пра гэта журанлістам заявіў прэс-сакратар Пуціна Дзмітрый Пяскоў у адказ на пытанне пра магчымае размяшчэнне расійскай ядзернай зброі ў Беларусі.
"Ні для каго не сакрэт, што, безумоўна, размяшчэнне розных відаў узбраенняў каля нашых межаў, якія могуць уяўляць для нас небяспеку, запатрабуе прыняцця адпаведных крокаў з тым, каб збалансаваць сітуацыю. Тут магчымыя самыя розныя варыянты", — цытуе ТАСС яго словы.
Раней Аляксандр Лукашэнка заявіў, што Беларусь можа папрасіць у Расіі размяціць ядзерную зброю на нашай тэрыторыі.
Потым з аналагічнай заявай выступіў міністр замежных спраў Уладзімір Макей: "Тое, пра што заявіў прэзідэнт Аляксандр Лукашэнка, што мы разглядаем магчымасць размяшчэння на тэрыторыі Беларусі ядзернай зброі, — гэта адзін з магчымых адказаў на магчымыя будучыя дзеянні з боку Паўночнаатлантычнага альянсу на тэрыторыі Польшчы".
