Лукашэнка кажа, што завёз у Беларусь "не адзін дзясятак" ядзерных боегаловак

У Беларусь нібыта завезлі некалькі дзясяткаў боегаловак ядзерных ракет. Пра гэта Аляксандр Лукашэнка заявіў 10 снежня падчас паездкі ў Барысаў.

"Я сюды ўвёз ядзерныя боегалоўкі. Не адзін дзясятак штук. Многія пішуць: "А, гэта жарт, ніхто нічога не ўвёз". Увезлі. А тое, што яны гавораць, што гэта жарт, значыць, яны празявалі. Яны нават не заўважылі, як мы сюды іх завезлі", — перадае словы Лукашэнкі яго прэс-служба.

Сумневы ў тым, што на тэрыторыі Беларусі ёсць ядзерная зброя, выказвалі і айчынныя, і замежныя эксперты. Аб'яднанне былых беларускіх сілавікоў BELPOL ў лістападзе ў сваім расследаванні прыйшло да высноваў, што расійскай ядзернай зброі ў Беларусі няма.

Пазней на саміце NATO высокапастаўлены чыноўнік Альянса заявіў, што доўгатэрміновага размяшчэння ядзернай зброі ў Беларусі не было.

Тым не менш дзяржсакратар Савета бяспекі Беларусі Аляксандр Вальфовіч сцвярджаў, быццам у Лукашэнкі ёсць і "чырвоная кнопка", і "ядзерны чамаданчык".

Пра размяшчэнне ў Беларусі расійскай тактычнай ядзернай зброі было абвешчана ўлетку 2023 года.