Створаныя прававыя ўмовы накіравання арміі Беларусі на вайну ва Украіне — BELPOL
Ракета — носьбіт ядзернай зброі / Мінабароны Расіі / AP
Арганізацыя BELPOL сцвярджае, што з падпісаннем дамовы "Аб гарантыях бяспекі ў межах Саюзнай дзяржавы" створаны юрыдычныя падставы для накіравання беларускіх вайскоўцаў на вайну ва Украіну. Нагадаем, што гэты дакумент быў падпісаны 6 снежня ў Мінску Аляксандрам Лукашэнкам і Уладзімірам Пуціным.
Паводле прадстаўнікоў BELPOL, тэкст дамовы трапіў у іх распараджэнне, але з меркаванняў бяспекі крыніцы яны пакуль не публікуюць яго цалкам.
З некаторых цытат вынікае, што бакі абавязваюцца прадстаўляць адзін аднаму ваенную і іншую дапамогу ў выпадку ўзнікнення пагрозы іх суверэнітэту, тэрытарыяльнай цэласнасці, знешнім межам Саюзнай дзяржавы ці канстытуцыйнаму ладу. Дапамога прадугледжваецца з выкарыстаннем "усіх наяўных сіл і сродкаў".
BELPOL робіць выснову, што дамова стварае прававыя падставы для накіравання грамадзян Беларусі на вайну ва Украіну "для абароны тэрытарыяльнай цэласнасці РФ і Саюзнай дзяржавы".
Акрамя таго, Расія атрымлівае магчымасць уводу сваіх войскаў у Беларусь для абароны "канстытуцыйнага ладу" ад "экстрэмісцкіх арганізацый і груп". Дакумент таксама дазваляе стварэнне новых расійскіх ваенных баз на тэрыторыі Беларусі.
