Ксёндз Вячаслаў Барок з'ехаў з Беларусі
Ксёндз Вячаслаў Барок з'ехаў з Беларусі, паведамляе тэлеграм-канал @christianvision. На ксяндза-пробашча расонскага касцёла распачалі чарговую адміністрацыйную справу і пачалі ў пачатку ліпеня выклікаць ў міліцыю, спрабавалі правесці агляд па месцы жыхарства. Пасля гэтага Барок вырашыў часова пакінуць краіну. У аўторак ён збіраецца распавесці пра сітуацыю на сваім YouTube-канале.
У снежні 2020 года Вячаслаў Барок адбыў 10 сутак адміністрацыйнага арышту за размешчаную ў Facebook працу мастака Уладзіміра Цеслера "Стоп лукашызм!". Сёлета следчыя правяралі яго канал на YouTube, акаўнты ў Фэйсбуку і Instagram. Шукалі "экстрэмізм".
Ксёндз Барок быў госцем Еўрарадыё ў праграме "Ідэя Х".
