Літва можа ўвесці рэжым надзвычайнага становішча праз сітуацыю на мяжы Беларусі
Агне Білатайтэ / Delfi.lt
У сувязі з вялікай плынню мігрантаў на беларуска-польскай мяжы і пагрозы гэтай сітуацыі для Літвы Міністэрства ўнутраных спраў прапануе ўвесці ў Літве надзвычайнае становішча, паведамляе Delfi.lt са спасылкай на кіраўніцу МУС краіны Агне Білатайтэ.
Паводле звестак розных крыніц, на мяжы Беларусі з Польшчай могуць знаходзіцца ад адной да пяці тысяч нелегальных мігрантаў.
Як паведамляла Еўрарадыё, праз сітуацыю з мігрантамі на мяжы Беларусі з Польшчай Служба аховы дзяржаўнай мяжы Літвы прыступіла да перадыслакацыі. Цяпер памежнікі праводзяць сустрэчы са штабам Узброеных сіл Літвы, узгадняюць свае дзеянні з паліцыяй і службай грамадскай бяспекі.
У панядзелак у Польшчы адбудзецца паседжанне антыкрызіснага штаба ўпраўлення з удзелам прэм'ер-міністра краіны Матэвуша Маравецкага. Паседжанне будзе прысвечанае сітуацыі на польска-беларускай мяжы, дзе з боку Беларусі раніцай у панядзелак з'явілася вялікая група нелегалаў-мігрантаў.
