Міністр інфармацыі прыгразіў заблакаваць TUT.by
Міністр інфармацыі Ігар Луцкі паведаміў, што яго ведамства працягвае маніторыць матэрыялы партала TUT.by для прававой ацэнкі. Па яго словах, гаворка ідзе пра арт. 38 закона аб СМІ (Забароненая інфармацыя), а таксама пра недакладную інфармацыю, якая здольная нанесці шкоду грамадскім і дзяржаўным інтарэсам.
Як распавядала Еўрарадыё, 19 студзеня Эканамічны суд Мінска не задаволі апеляцыю TUT.by на сваё ранейшае рашэнне ад 3 снежня 2020 года. У выніку, з сённяшняга дня партал афіцыйна пазбаўлены статусу СМІ.
Луцкі заявіў, што яго ведамства працягвае сачыць за інфармацыйнай прасторай краіны.
"І пры парушэнні заканадаўства аб СМІ і іншых законаў Рэспублікі Беларусь неадкладна будуць выносіцца папярэджанні альбо патрабаванні аб выдаленні недакладнай інфармацыі. Альбо прымацца рашэнне аб спыненні дзейнасці альбо распаўсюджвання такой інфармацыі шляхам блакавання", — прыгразіў міністр.
Дарэчы, пасля 9 жніўня ў Беларусі шэраг недзяржаўных інфармацыйных сайтаў былі заблакаваныя без усялякага тлумачэння. Многія з іх дагэтуль даступныя толькі з дапамогай VPN альбо перайшлі на запасныя адрасы. На ранейшы адрас вярнулася хіба што "Наша Ніва" (nn.by).
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
