На БТ расказалі, дзе будуць вучыцца студэнты закрытых прыватных ВНУ
Студэнты атрымалі прапановы (ілюстрацыйнае фота) / sb.by
На БТ расказалі, дзе будуць вучыцца студэнты закрытых прыватных ВНУ — Інстытута прадпрымальніцкай дзейнасці і Універсітэта права і сацыяльна-інфармацыйных тэхналогій. Іх больш за 3 тысячы чалавек. Маладым людзям прапанавалі працягнуць адукацыю ў БДПУ, БДУ, БДУІР і БДЭУ. Чакаецца, што Беларускі дзяржаўны эканамічны ўніверсітэт прыме каля 800 чалавек. Напісалі заявы аб пераводзе ў БДПУ 125 студэнтаў, некалькі дзясяткаў яшчэ не прынялі рашэнне.
Цяпер студэнты ўдзельнічаюць у "арганізацыйных сходах", а цэнтралізаваная перадача асабістых спраў запланаваная на жнівень.
Студэнты магілёўскага філіяла Універсітэта права і сацыяльна-інфармацыйных тэхналогій змогуць працягнуць адукацыю ў Магілёўскім дзяржуніверсітэце імя Куляшова, а гродзенскага філіяла — у Гродзенскім дзяржуніверсітэце імя Янкі Купалы. Тыя, хто не захоча пераводзіцца ў гэтыя ВНУ, змогуць самастойна выбраць месца навучання па сваёй спецыяльнасці.
