На мінскіх вуліцах да пачатку лета высадзяць больш за 1,5 млн кветак
Расада ў цяпліцах парнікова-цяплічнага камбіната / minsknews.by
Да пачатку гэтага лета мінскі парнікова-цяплічны камбінат вырасціў больш за 1,5 мільёна кветак. У чэрвені яны павінны з'явіцца на вуліцах Мінска.
Для кожнага раёна распрацавалі сваю схему (спецыфікацыю) і прадугледзелі сваю гаму квітнеючых раслін. У адным будзе зроблены ўпор на блакітныя і сінія адценні, у іншым — на чырвоныя, у трэцім — ружовыя ці белыя, расказвае агенцтва "Минск-Новости". Да пачатку летняга сезона супрацоўнікі камбіната вырошчваюць больш за 120 разнавіднасцяў і гатункаў раслін. Адных бягоній 15 гатункаў.
"Самая папулярная ў нас бягонія грацыліс, або вечнаквітучая, — пасадзілі 470 тысяч штук", — кажуць на прадпрыемстве. Кветкі, якія плануюць гэтым летам высадзіць на мінскія вуліцы, займаюць цяпер 1,6 гектара цяпліц. Да 10 чэрвеня расліны ў кашпо і расадзе перададуць "Мінскзелянбуду". А ў сярэдзіне чэрвеня яны павінны з'явіцца на вуліцах.
