Па Гродне гуляла казуля, якая ўцякла з заапарка (відэа)
Па Гродне гуляла казуля, якая ўцякла з заапарка. Як піша "Гродзенская праўда", здарэнне адбылося раніцай 25 траўня. Жывёла не выглядала спалоханай, яна падыходзіла да людзей.
Тым часам у Гродзенскім заапарку ахова заўважыла адсутнасць у вальеры казулі. Напярэдадні для яе адаптавалі новае памяшканне. Відаць, з-за таго, што казуля адрозніваецца ад іншых прадстаўнікоў свайго віду малымі памерамі, яна змагла пакінуць вальер і выйсці на вуліцу. Пра знікненне казулі паведамілі міліцыянерам і ратавальнікам. Неўзабаве прагулку жывёлы спынілі і вярнулі яе назад у вальер. Дырэктар заапарка Віталь Гуменны кажа, што работнікі зрабілі новыя ўцёкі казулі немагчымымі.
