Паліцыя пачала расследаванне па матэрыялах Давіда Міранды

Паліцыя Лондана кажа, што падчас першаснага вывучэння канфіскаваных у бразільца Давіда Міранды носьбітаў інфармацыі былі знойдзеныя вельмі канфідэнцыйныя звесткі. Іх апублікаванне можа паставіць пад пагрозу жыцці людзей.

У паліцыі кажуць таксама пра пачатак крымінальнага расследавання, перадае ВВС.

Суддзі ў Лондане, якія разглядаюць пазоў Міранды да брытанскіх уладаў, пастанавілі, што матэрыял, канфіскаваны ў яго, можа даследавацца толькі з мэтай нацыянальнай бяспекі.

Нагадаем, што Міранду, партнёра журналіста Guardian Глена Грынвальда, які пісаў пра Wikileaks і Эдварда Сноўдэна, затрымалі ў мінулую нядзелю ў аэрапорце Хітраў. Ён распавёў, што на працягу 9-гадзіннага допыту супрацоўнікі брытанскіх спецслужбаў пагражалі яму турэмным зняволеннем, забралі ў яго электронныя носьбіты, а таксама паролі да электроннай пошты і акаўнтаў у сацыяльных сетках.

Суддзі пакуль што забаранілі паліцыі вывучаць, капіяваць і перадаваць канфіскаваны матэрыял.

Фота — theguardian.com