Палітзняволенай Вікторыі Кульшы другі раз дадалі тэрмін

7 красавіка ў судзе Рэчыцкага раёна палітзняволенай Вікторыі Кульшы агучылі чарговы прысуд, паведамляюць праваабаронцы.

Суддзя Станіслаў Іванюценка прызнаў яе вінаватай паводле ч. 1 арт. 411 Крымінальнага кодэкса (злоснае непадпарадкаванне законным патрабаванням адміністрацыі калоніі) і дадаў яшчэ адзін год зняволення ў дадатак да 3,5 года калоніі. Агульны прысуд Вікторыі Кульшы — чатыры з паловай гады калоніі агульнага рэжыму.

Вікторыя працавала інжынеркай па ахове працы. Яе затрымалі 4 лістапада 2020 года за адміністраванне тэлеграм-канала і чата "Кіроўцы 97%". Яе асудзілі паводле "народнага" 342-га артыкула (Арганізацыя і падрыхтоўка дзеянняў, якія груба парушаюць грамадскі парадак) на 2,5 года.

У чэрвені 2021-га за непадпарадкаванне адміністрацыі калоніі ёй прысудзілі яшчэ адзін год зняволення. Сярод "парушэнняў" у яе былі пазначаныя такія: "знішчэнне ліста, напісанага да дачкі"; "выйшла ў прыбіральню, не папярэдзіўшы"; "была няветлівая з супрацоўнікамі папраўчай установы"; "знаходзілася з расшпіленым гузікам на паліто", "пры адкрыцці дзвярэй камеры не ўстала, не прывіталася, не назвалася".

Праваабаронцы паведамляюць, што Кульша некалькі разоў трымала галадоўку, пратэстуючы супраць ціску з боку адміністрацыі. Адміністрацыя калоніі ужывае супраць яе фізічны і псіхалагічны ціск. Стан здароўя Вікторыі моцна пагоршыўся.

Пасля новага прысуду Кульша знаходзіцца ў ІЧУ Рэчыцы і чакае этап у гомельскі СІЗА.