Праймерыз у ЗША: аднапартыйцы пачалі выступаць супраць Трампа

Еўрапейскія СМІ актыўна абмяркоўваюць “супераўторак” перадвыбарнай гонкі ў ЗША, на якой рэспубліканец Дональд Трамп і дэмакратка Хілары Клінтан сталі безумоўнымі фаварытамі сваіх партый. Галасаванні тады ладзіліся ў 12 штатах, яны перамаглі ў 7 з іх.

Перамогу Хілары Клінтан большасць аналітыкаў называюць прадказальнай. Яе кампанія будуецца на кансалідацыі афраамерыканскіх і іспанскамоўных суполак, у імя “цэласнай Амерыкі”.

А вось пераканальная перамога Дональда Трампа здзівіла не толькі яго канкурэнтаў, але і многіх аднапартыйцаў. У сувязі з гэтым аналітыкі кажуць пра сапраўдны раскол сярод рэспубліканскай палітычнай эліты. Частка “старых” рэспубліканцаў заявіла, што ніколі не падтрымае кандыдатуру Трампа. 

Іспанская El País піша, што перамога Трампа ў супераўторак выклікала трывогу ў рэспубліканцаў. І кіраўніцтва можа паспрабаваць спыніць яго прызначэнне адзіным прадстаўніком ад партыі на выбарах. Галоўны аргумент — статыстыка. Паводле яе, мільярдэр набірае толькі 46% дэлегатаў і 34% — ад выбаршчыкаў. Такім чынам, дзве траціны выбаршчыкаў прагаласавалі за іншых кандыдатаў. Калі Рэспубліканская партыя кансалідуецца і абярэ іншага адзінага кандыдата, тэарэтычна ён зможа стаць заменай Трампу. Але ні Тэд Крус, ні Марка Рубіа хутчэй за ўсё не пойдуць на гэта, адзначае выданне.

Аналітык брытанскай The Guardian Гэры Янг выказваецца пра тое, чаму некаторыя прадстаўнікі Рэспубліканскай партыі пачалі адмаўляцца ад падтрымкі Трампа:

“Гэта выклікала паніку ў многіх рэспубліканскіх сенатараў і кангрэсменаў. І не таму, што погляды і перакананні Трампа сталі надта непрыемнымі для іх, а таму, што калі ён стане кандыдатам у прэзідэнты, яны будуць павінныя тлумачыць, ці падзяляюць яны базавыя каштоўнасці, партыйны погляд. Або таму, чаму яны пачалі асуджаць Трампа, калі ўвогуле пачалі, так позна і нерашуча”.

Прафесар Лонданскай школы эканомікі Пітэр Трубовіц распавядае Euronews, чаму Трамп набірае папулярнасць у людзей:

“У ЗША сёння назіраецца стагнацыя заробкаў, расце грамадская няроўнасць. У такім кантэксце многія амерыканцы не давяраюць Вашынгтону, мяркуючы, што ўлады абслугоўваюць толькі інтарэсы найбагацейшых. Гэтыя настроі асабліва моцныя сярод электарату рэспубліканцаў, там, паводле апытанняў, Вашынгтону давярае толькі 6%. Дональд Трамп ідзе на выбары як незалежны кандыдат, як чалавек, якому не патрэбныя чужыя грошы. Незалежны ён у тым сэнсе, што не з’яўляецца часткай эліты Вашынгтона. І менавіта таму, я мяркую, прыхільнікі рэспубліканцаў у ЗША цяпер падтрымліваюць яго”.

Тым часам былы нейрахірург Бэн Карсан 2 сакавіка абвясціў, што спыняе свой удзел у прэзідэнцкай гонцы. Сваё рашэнне ён патлумачыў адсутнасцю “палітычнага прасоўвання”, паведамляе Reuters.

Пакуль у топах праймерыз акрамя фаварытаў Трампа і Клінтан застаюцца дэмакрат Берні Сандэрс, а сярод рэспубліканцаў — Тэд Крус і Марка Рубіа.