Рэкорднае падзенне цаны на нафту абрынула расійскі рубель (відэа)

Цана на нафту рэзка ўпала пасля таго, як картэль краін-вытворцаў і экспарцёраў нафты ОПЕК (на яе прыпадае 40% сусветнай здабычы нафты) аб'явіў пра сваё рашэнне не скарачаць аб'ёмы здабычы. Пра гэтае рашэнне было аб'яўлена па выніках сустрэчы ў Вене.

Генеральны сакратар ОПЕК Салем Аль-Бадры заявіў, што арганізацыя вырашыла захаваць здабычу на цяперашнім узроўні ў 30 млн барэляў у суткі і не спрабаваць маніпуляваць коштамі пры дапамозе скарачэння вытворчасці. "Так, цана зніжаецца. Гэта не азначае, што нам трэба рабіць паспешныя рухі і спрабаваць штосьці з гэтым зрабіць", — цытуе яго словы ВВС.

Неўзабаве кошт на нафту маркі "Брэнт" апусцілася ніжэй за 72 долары за барэль (71,52) — больш чым на 6% ніжэй, чым было пасля закрыцця мінулых таргоў. Гэта танней, чым яна каштавала на мінімуме, адзначаным у жніўні 2010 года.

Адначасова курс расійскага рубля на Маскоўскай біржы абнавіў гістарычныя мінімумы ў адносінах да асноўных валют. Курс долара ўвечары 27 лістапада перавысіў 48,65 рубля, курс еўра падняўся на 1,21 рубля і ўпершыню ў гісторыі перавысіў адзнаку ў 60 рублёў. Сёння еўра падняўся да 62,031 рубля, курс долара вырас да 49,797.

Адзначым, што з чэрвеня 2014-га цэны на нафту знізіліся на 30%. Расія, якая не ўваходзіць у ОПЕК, можа прыняць рашэнне аб зніжэнні здабычы нафты, каб падтрымаць кошт барэля.

Фота — Reuters