Больш за 20 ператрусаў прайшлі ў беларускіх дамах журналістаў-эмігрантаў

У чэрвені-ліпені ў Беларусі адбыўся мінімум 21 ператрус дома ў журналістаў-эмігрантаў, якія працягваюць працаваць у медыя. Такую статыстыку паведамляе прэс-служба Беларускай асацыяцыі журналістаў.

"У абсалютнай большасці па месцах рэгістрацыі журналістаў і журналістак сілавікі прыязджалі з пастановамі на ператрус па заведзеных на медыйшчыкаў крымінальных справах", — адзначаюць у БАЖ.

У шэрагу выпадкаў са сваякамі журналістаў запісвалі відэа, як гэта было з бацькамі вядоўцаў ТікТок-канала "Зеркало".

БАЖ лічыць гэтую новую хвалі ператрусаў спосабам ціску на журналістаў і медыя: "Улады не пакідаюць у спакоі не толькі журналістаў, што вымушана з’ехалі з Беларусі пад пагрозай рэпрэсій, але і іх родных".

Цяпер за кратамі ў Беларусі знаходзяцца мінімум 37 прадстаўнікоў і прадстаўніц медыя.