Беларускіх біятланістаў абяцаюць забяспечыць патронамі
З такой заявай выступіў генеральны сакратар Беларускай федэрацыі біятлону Анатоль Стромскі.
Нагадаем, што некалькі тыдняў таму стала вядома, што нацыянальная зборная застаецца без патронаў. Нямецкі філіял фінскай кампаніі Lapua заявіў, што існуе забарона на пастаўку ўзбраенняў у нашу краіну.
Па словах Стромскага, якія перадае БЕЛТА, пытанне яшчэ і цяпер не да канца вырашанае. У Нямеччыне вядуцца перамовы з прадстаўнікамі кампаніі Lapua. Іх вядзе галоўны трэнер жаночай зборнай Андрыян Цыбульскі.
У той жа час спартовы чыноўнік падкрэсліў, што цяпер нацыянальная каманда забяспечаная патронамі добрай якасці. Як прыклад ён згадаў паспяховы выступ Дар'і Домрачавай на чэмпіянаце свету ў нямецкім Рупольдынгу.