Сілавікі ў Кыргызстане зноў пайшлі на штурм дома экс-прэзідэнта

8 жніўня кыргызстанскія сілавікі зноў пачалі штурм рэзідэнцыі экс-прэзідэнта краіны Алмазбека Атамбаева, піша "Новая газета" са спасылкай на мясцовыя СМІ.

Паведамляецца, што ў бок рэзідэнцыі ў сяле Кой-Таш паехала калона сілавікоў. Тым часам дом экс-прэзідэнта атачылі сотні яго прыхільнікаў. Відавочцы кажуць пра пажар і выбухі светлашумавых гранат. 

Паводле звестак Мінздароўя Кыргызстана, пры сутычках у Кой-Ташы пацярпелі ўжо 79 чалавек, як мінімум адзін чалавек загінуў. Парламент прапанаваў абвясціць у краіне надзвычайнае становішча.

Нагадаем, што ўвечары 7 жніўня спецназ паспрабаваў узяць штурмам рэзідэнцыю Атамбаева і затрымаць экс-прэзідэнта. Аднак яго прыхільнікі аказалі супраціў, таму спецназаўцы былі вымушаныя адступіць. Сам Атамбаеў прызнаўся, што падчас штурму таксамс страляў, але — у паветра.

Прэзідэнт Кыргызстана абвінаваціў Атамбаева ў "грубым парушэнні законаў". У аказ той заклікаў на бестэрміновы мітынг каля будынка парламента і адміністрацыі прэзідэнта ў Бішкеку.

Атамбаева падазраюць у карупцыі. Напрыканцы чэрвеня парламент пазбавіў яго недатыкальнасці.