Сотні прадстаўнікоў рэжыму Лукашэнкі трапяць пад санкцыі Польшчы
Польшча ўвядзе новыя санкцыі супраць прадстаўнікоў мінскага рэжыму / pexels.com, ілюстрацыйнае фота
Некалькі соцень прадстаўнікоў рэжыму Лукашэнкі трапяць пад польскія санкцыі, паведамляе прэс-служба польскага Міністэрства ўнутраных спраў і адміністрацыі.
Прычынай называецца прысуд журналісту і актывісту польскай меншасці Анджэю Пачобуту, які Вярхоўны суд Беларусі пакінуў у сіле.
Пра ўвядзенне санкцый будзе абвешчана 29 траўня. Гаворыцца, што ў спіс трапяць палітыкі, суддзі, пракуроры ды іншыя асобы, адказныя за палітычныя рэпрэсіі, у тым ліку супраць прадстаўнікоў польскай меншасці.
Як паведамляла Еўрарадыё, 26 траўня Вярхоўны суд разглядаў у закрытым рэжыме апеляцыю па справе Анджэя Пачобута і пакінуў яе ў сіле. У лютым Пачобута асудзілі на 8 гадоў пазбаўлення волі.
