Пяць фактаў пра Анаіс Марын — новага спецдакладчыка ААН па Беларусі
Новым спецдакладчыкам ААН па правах чалавека ў Беларусі стала Анаіс Марын. Яна замяніла на гэтай пасадзе Міклаша Харашці.
Мандат спецдакладчыка па Беларусі быў заснаваны СПЧ ААН у ліпені 2012 года, а затым штогод падаўжаўся. Спецдакладчык рэгулярна рыхтуе справаздачы аб сітуацыі з правамі чалавека ў Беларусі, прадстаўляючы іх Савету ААН па правах чалавека і Генеральнай Асамблеі ААН. Беларускія ўлады мандат спецдакладчыка не прызнаюць і адмаўляюцца ад супрацоўніцтва з ім.
Пяць фактаў пра Анаіс Марын
1. Разумее беларускую мову і ўмее чытаць па-беларуску
Анаіс Марын нарадзілася ў 1977 годзе. Палітолаг, спецыялізуецца на міжнародных адносінах. Супрацоўнічала з Фінскім інстытутам міжнародных адносін. Акрамя беларускай мовы, якую разумее і на якой умее чытаць, свабодна валодае французскай, англійскай і рускай мовамі.
2. Была ў спісе неўязных у Беларусь
Пра гэта Анаіс Марын распавядала ў інтэрв’ю Еўрарадыё ў 2013 годзе. Ці знаходзіцца яна ў гэтым спісе цяпер, дакладна не вядома.
3. Выступала за прадаўжэнне санкцый ЕС ў дачыненні да Беларусі
Анаіс Марын настойвала на прадаўжэнні санкцый Еўрасаюза ў дачыненні да Беларусі да таго моманту, пакуль Беларусі не выканае ўсе патрабаванні ЕС. У той жа час лічыла, што санкцыі ў дачыненні да Беларусі не даюць належнага эфекту, а таксама была перакананая, што беларускія ўлады ніколі не пойдуць на рэабілітацыю палітзняволеных. Так ці інакш, у 2016 годзе большасць санкцыйных мер былі прыпыненыя.
4. Лічыла, што Беларусі не месца ва “Усходнім партнёрстве”
Марын сцвярджала, што Беларусь была ўключаная ў праграму “Усходняе партнёрства” беспадстаўна — толькі праз асабістыя амбіцыі асобных еўрапейскіх чыноўнікаў. Адначасова Анаіс Марын сцвярджала, што ў ЕС няма канкрэтнай праграмы развіцця адносін з Беларуссю.
5. Упэўненая, што ў ЕС няма палітыкаў, якія насамрэч разбіраюцца ў “беларускім пытанні”
Анаіс Марын выступала за “дэпалітызацыю адносін” з Беларуссю. Яна сцвярджала, што ў Еўрасаюзе няма палітыкаў, якія разумеюць, што насамрэч адбываецца ў нашай краіне. З іншага боку, беларусы ў сваёй большасці не разумеюць, чаму і навошта ЕС уводзіць свае санкцыі, і лічаць, што “ў турмах сядзяць не палітзняволеныя, а тыя, каго насамрэч недарэмна пакаралі”.
“Я не кажу, што неабходна дэпалітызаваць адносіны з рэжымам, што трэба супрацоўнічаць з рэжымам. Не! Я кажу, што неабходна распачынаць трэці шлях для нармальнага супрацоўніцтва на такім узроўні, на якім і так ужо ідзе супрацоўніцтва, — казала Анаіс Марын у інтэрв’ю Еўрарадыё. — Па асобных сектарах, па пэўных тэмах супрацоўніцтва ўсё адно ідзе. Неафіцыйна асобныя краіны ЕС, на жаль, вядуць такое супрацоўніцтва, бізнес ідзе выдатна! Я кажу пра тое, што трэба гэта рабіць адкрыта, празрыста. І каб прадстаўнікі грамадзянскай супольнасці маглі маніторыць тое, што адбываецца”.
