Спрабуем зразумець, што рабіць з платнай бронню чаргі на мяжы

Калі ўказ Саўміна набудзе моц раней, чым вы скарыстаецеся забраняванай чаргой, вам вернуць грошы / pixabay
Калі ўказ Саўміна набудзе моц раней, чым вы скарыстаецеся забраняванай чаргой, вам вернуць грошы / pixabay

Раніцай 17 жніўня ў чатах прымежных гарадоў паднялася паніка. Беларусы даведаліся, што магчымасці забраняваць за грошы месца ў чарзе на мяжы больш не будзе. А гэта пагражае шматгадзінным чаканнем у жывой чарзе.

— Для людзей, якія вымушаныя працаваць у Польшчы, бо дома проста няма дзе, усё дрэнна. Я пра тых, каму трэба не ганяць туды-сюды, а паўнавартасна працаваць, — пішуць у чаце аднаго з памежных гарадоў.

Непрыемныя змены прадугледжвае ўказ "Аб сістэме электроннай чаргі транспартных сродкаў у пунктах пропуску і забеспячэнні памежнай бяспекі".

Пры гэтым магчымасць платнага бранявання на сайце "Белмытнясэрвісу" ўсё яшчэ ёсць. Да таго ж браняваць месца ў чарзе можна было за сем дзён да выезду, так што ў шмат каго ўжо былі выкуплены месцы на тыдзень наперад. Што з імі рабіць?

На сайце "Белмытнясэрвісу" апублікавалі тлумачэнне: пакуль што працягвае дзейнічаць усталяваны парадак бранявання электроннай чаргі. Змены набудуць моц, толькі калі да прэзідэнцкага ўказа дадасца пастанова Саўміна, якая тлумачыць яго. Але калі гэта здарыцца? І што рабіць з ужо забраняванай чаргой?

 

Я забранявала чаргу. Што цяпер з ёй рабіць?

Карэспандэнтка Еўрарадыё патэлефанавала на гарачую лінію "Белмытнясэрвісу". Прадставілася жыхаром памежжа і паспрабавала высветліць, ці можна ўсё яшчэ выехаць у Польшчу, пазбегнуўшы шматгадзіннага прастою ў "жывой чарзе".

— Свабодныя месцы можна браняваць на пяць дзён наперад, — расказалі нам у "Белмытнясэрвісе".

— А калі я ўжо забранявала чаргу на 24 жніўня — да таго, як з'явіліся навіны пра змены, — я магу ехаць?

— Пакуль што — так. Глядзіце, да набыцця моцы пастановай Савета Міністраў — менавіта пастановы, а не ўказа прэзідэнта — усё працуе ў штатным рэжыме. Гэта значыць, дзейнічае ўсталяваны раней парадак бранявання электроннай чаргі.

А пастанова павінна будзе вызначыць, якім будзе парадак функцыянавання электроннай чаргі.

Пытаемся понять, что делать с платной бронью очереди на границе
Усе чакаюць / pixabay

— Але ж няма вядомай даты, калі яна набудзе моц?

— Пакуль што няма. Мы таксама чакаем.

— А калі заўтра? Ці на гэтым тыдні? Вось яна набывае моц — а ў мяне чарга на 24 жніўня. Я магу ехаць? Або бронь адмяняецца?

— Хутчэй за ўсё, адмяняецца, і тады трэба будзе проста напісаць заяву на вяртанне грошай за браняванне на электронны адрас, пазначаны ў нас на сайце.

— Карацей, да самага выезду лепш абнаўляць навіны і правяраць, ці не прынялі пастанову?

— Так, можаце чытаць навіны ў нас на сайце, мы ўсё апублікуем.

 

Будзе даражэй?

Раней беларусы плацілі за рэгістрацыю ў чарзе. Тое, што платныя месцы прыбяруць, не значыць, што больш не будзе за што плаціць. Усе транспартныя сродкі пры ўездзе ў зону чакання павінны будуць рэгістравацца ў электроннай чарзе. І вось за гэтую рэгістрацыю трэба будзе заплаціць.

Колькі? Ці абыдзецца гэта даражэй, чым платнае браняванне чаргі? У "Белмытнясэрвісе" яшчэ не ведаюць.

— Як гэта будзе функцыянаваць, даведаемся з пастановы Савета Міністраў. У нас няма зусім ніякай інфармацыі, колькі гэта будзе каштаваць, якія будуць патрабаванні да зон чакання, як гэта будзе аплачвацца.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі