У 2018 годзе на 19 беларускіх вакзалах і ў аэрапорце з'явіцца свабодны Wi-Fi
У наступным годзе на 19 галоўных беларускіх вакзалах і ў аэрапорце з'явіцца свабодны Wi-Fi. Гэта будзе адным з этапаў падрыхтоўкі транспартнай інфраструктуры Беларусі да "Еўрапейскіх гульняў", якія нашая краіна прыме ў 2019 годзе.
Пра тое, як Беларусь рыхтуецца да гульняў, 27 кастрычніка на сумесным пасяджэнні абедзвюх палат беларускага парламента распавёў віцэ-прэм'ер Анатоль Калінін.
Таксама Беларусь закупіць да 2019 года 140 турыстычных аўтобусаў і 30 аўтобусаў павышанай камфортнасці для мінскіх маршрутаў. Акрамя таго, для "Беларускай чыгункі" плануецца закупіць дадатковыя цягнікі Stadler у Нямеччыне. А "Белавія" ў 2018 годзе збіраецца набыць тры новыя самалёты Embraer.
