У 2023 годзе ў Беларусі ад раку памерлі 17 тысяч чалавек
Шмат беларусаў змагаюцца з анкалогіяй / pixabay.com
У 2023 годзе ў Беларусі ад раку памерлі 17 тысяч чалавек. Гэта афіцыйныя даныя РНПЦ анкалогіі і медыцынскай радыялогіі. Іх агучыў на прэс-канферэнцыі намеснік дырэктара па навуковай працы згаданай медустановы Сяргей Красны.
Прыблізна столькі ж беларусаў памерлі ад раку ў 2017 годзе. А ў 2019-м было амаль 19 тысяч.
Па словах Краснага, летась выявілі 56,5 тысячы новых выпадкаў анкалагічных захворванняў. У жанчын на першым месцы па распаўсюджанасці рак малочнай залозы, рак тоўстай кішкі і гінекалагічныя захворванні. У мужчын — рак прастаты, рак лёгкага і тоўстай кішкі.
Прычым рак тоўстай кішкі — спецыфіка Беларусі з-за асаблівасцяў харчавання. "У нас не прынята есці шмат гародніны, садавіны, — кажа Сяргей Красны. — У нас за гародніну прымаецца бульба, што не зусім правільна... Акрамя таго, у беларусаў прынята есці вельмі шмат мясных прадуктаў, у прыватнасці чырвонага мяса, што таксама можа спрыяць развіццю пухлін тоўстай кішкі. Ну і сюды варта яшчэ аднесці маларухомы лад жыцця і наяўнасць такіх прадуктаў, якія мы адносім да фаст-фуду".
