У Горацкім раёне школьнікаў адправілі на палі збіраць камяні і смецце
Хлопчыкі і дзяўчынкі "з гонарам і стараннасцю прынялі ўдзел у працоўным дэсанце" / gorkiv.by
У Горацкім раёне школьнікаў адправілі на палі збіраць не толькі камяні, але і смецце. Мясцовы ідэолаг кажа, што дзеці "не толькі робяць іх больш прыдатнымі для сельскагаспадарчых работ, але і праяўляюць клопат аб навакольным асяроддзі".
На палі сельгаспрадпрыемства "Горацкае" адправілі вучняў 7-11 класаў Шышаўскай сярэдняй школы. Раённая газета піша, што хлопчыкі і дзяўчынкі "з гонарам і стараннасцю прынялі ўдзел у працоўным дэсанце".
Збор камянёў у Беларусі ідзе з сакавіка, калі Аляксандр Лукашэнка прылятаў у Ашмянскі раён на верталёце і вельмі абураўся, што палі засеялі, але перад гэтым не прыбралі камяні. Мясцовыя ўлады адправілі на палі вайскоўцаў, студэнтаў, чыноўнікаў, працаўнікоў прадпрыемстваў, устаноў адукацыі і культуры, а пасля і асуджаных. Апошнім часам падключылі і школьнікаў. І ўсё для таго, каб у бліжэйшы час паведаміць Лукашэнку, што камяні сабралі.
