У Крупскім раёне сілавікі стралялі ў 19-гадовага хлопца
Супрацоўнік АМАП, ілюстрацыйнае фота / sb.by
Сілавікі паведамляюць пра выкарыстанне зброі ў вёсцы Вялікі Лес Крупскага раёна. Стралялі ў 19-гадовага хлопца, мясцовага жыхара. Ён быў дома з бацькам і братам, калі да іх прыехалі супрацоўнікі ГУБАЗіК і АМАП.
Сілавікі сцвярджаюць, што прыехалі ў гэты дом на выклік — маўляў, "у міліцыю паступіла аператыўная інфармацыя: у адным з дамоў знаходзіцца група ўзброеных людзей". Гаспадара дома (яму 62 гады) і старэйшага сына 36-ці гадоў затрымалі. Малодшы выйшаў з нажамі і, са слоў сілавікоў, "выказваючы пагрозы". У міліцыі сцвярджаюць, што спачатку быў зроблены "папераджальны стрэл, пасля чаго была выкарыстаная зброя на паразу". Хлопец у бальніцы. У якім ён стане, сілавікі не ўдакладнілі.
