У Літву з пачатку года пераехала 12 тысяч беларусаў

Упершыню ў гісторыі Літвы колькасць замежнікаў, якія пражываюць у ёй, перавысіла 200 тысяч, паведамляе DELFI са спасылкай на Дэпартамент міграцыі. Паводле звестак на 1 верасня, у Літве пражывала 203 157 чалавек з розных замежных краін.

Самая вялікая дыяспара — украінская: іх у Літве налічваецца 85 579 чалавек. Большасць з іх прыбылі ў краіну пасля расійскага ўварвання.

Беларусаў у Літве — больш за 60 тысяч чалавек. На пачатку года нашых суайчыннікаў было ў краіне крыху больш за 48 тысяч. Рост беларускай дыяспары сёлета стаў самым хуткім у Літве.

Трэцяя па колькасці дыяспара — расійская. На пачатку года ў Літве пражывала 15 706 расіян, на 1 верасня — 16 179. Больш за палову з іх (8571) — гэта сталыя жыхары Літвы, якія жывуць тут пару дзясяткаў гадоў а то і даўжэй.