У Магілёве аўтааматар сёння пабіў інструктара аўташколы
Кіроўцу Audi 100 не спадабалася, як марудна разварочваўся вучэбны аўтамабіль.
Інцыдэнт адбыўся сёння раніцай на скрыжаванні вуліц Астроўскага і Сіманава побач з абласным ДАІ. Дачакаўшыся, калі машына аўташколы выканае разварот, уладальнік Audi 100 падрэзаў аўтамабіль, за рулём якой знаходзіўся вучань аўташколы, і выцягнуў з аўтамабіля інструктара. Не кажучы ні слова, ён ударыў мужчыну два разы ў твар.
Трэба адзначыць, што інструктар аўташколы — баксёр, аднак ён не ўвязаўся ў бойку, а выклікаў для разбіральніцтва супрацоўнікаў ДАІ.
Са словаў відавочцаў, аўтамабіль Audi 100 рухаўся з парушэннем хуткаснага рэжыму.
Фота — bymedia.net