У Маскве прайшлі перамовы па пастаўках беларускай малочнай прадукцыі
7 чэрвеня міністр сельскай гаспадаркі Расіі Дзмітрый Патрушаў правёў працоўную сустрэчу з беларускай дэлегацыяй, паведамляе прэс-служба ведамства.
Беларусы на чале з міністрам сельскай гаспадаркі і харчавання Леанідам Зайцам прыехалі абмяркоўваць абмежаванні на пастаўкі малочнай прадукцыі, якія ўвёў Рассельгаснагляд з 6 чэрвеня.
Патрушаў заявіў пра партнёрскі характар міжнароднага супрацоўніцтва абедзвюх краін, у тым ліку на рынку малака. Разам з тым ён нагадаў, што яго ведамства найперш стаіць на абароне інтарэсаў расійскіх сельгасвытворцаў і спажыўцоў.
Кіраўнік Рассельгаснагляду Сяргей Данкверт паведаміў, што абмежаванні на пастаўку малочнай прадукцыі з Беларусі — гэта вымушаная мера. Яна, па словах Данкверта, звязаная з неаднаразовымі выпадкамі парушэння ветэрынарна-санітарных нормаў і патрабаванняў Еўразійскай эканамічнай саюза і Расійскай Федэрацыі. Ён падкрэсліў, што пад абмежаванні трапіла толькі прадукцыя, у якой выяўлялася найбольшая колькасць парушэнняў і якая з'яўляецца сыравінай для індустрыяльных перапрацоўшчыкаў малака і пастэрызаваных, стэрылізаваных і ультрапастэрызаваных налівам вяршкоў; малака і сухіх, канцэнтраваных, кансерваваных і згушчаных вяршкоў; сыроваткі малочнай наліўной, канцэнтраванай, сухой; сыроватачнага канцэнтрату і малочнага бялку, які пастаўляецца ў тары аб'ёмам больш за 2,5 кг.
Данкверт дадаў, што ўся пералічаная прадукцыя ў тары да 2,5 кг не забароненая для паставак у Расію.
Па даручэнні Патрушава профільныя дэпартаменты расійскага міністэрства павінныя стварыць працоўную групу, разабрацца ў сітуацыі і разгледзець зняцце санкцыяў пры ўмове выпраўлення выяўленых парушэнняў.
Беларускі міністр Леанід Заяц прызнаў, што расійскі рынак з'яўляецца мэтавым для многіх беларускіх тавараў. Ён паабяцаў, што беларускі бок улічыць усе заўвагі і рэкамендацыі расійскіх партнёраў і ўзмацніць кантроль за якасцю прадукцыі.
Паведамляецца, што беларуская дэлегацыя папрасіла расійскага міністра даць даручэнне пра дадатковыя кансультацыі з Рассельгаснаглядам, на якіх гэтыя пытанні абмяркуюць на тэхнічным узроўні.
