У Мазыры частку лесапарку хочуць высекчы пад будоўлю царквы
Мазырскія ўлады па просьбе Тураўскай епархіі хочуць высекчы частку адзінага ў горадзе лесапарку. Там плануюць пабудаваць царкву імя расійскага князя Аляксандра Неўскага, перадае Радыё "Свабода".
Лесапарк — папулярнае ў мазырчукоў месца заняткаў спортам. Таму жыхары горада пачалі збор подпісаў у абарону лесапарку.
"У зімовы час гэта адзінае месца, дзе можна займацца на бегавых лыжах. Тут займаюцца фізкультурай навучэнцы медыцынскага і політэхнічнага каледжаў, ліцэяў будаўнікоў і геолагаў. На працягу навучальнага года штодзень у лесапарку займаюцца фізкультурай каля 500 навучэнцаў", — пішуць яны ў звароце да ўладаў.
Гараджане выступаюць супраць будаўніцтва царквы менавіта на месцы лесапарку.
Гарадскія ўлады абвясцілі грамадскія слуханні.
