У Мінск пасля тэхабслугоўвання вярнуўся самы вялікі беларускі Boeing
Транспартны самалёт Boeing 747-329SF / @mintransbelarus
У Нацыянальным аэрапорце "Мінск" пасля планавага тэхнічнага абслугоўвання прызямліўся самы вялікі беларускі самалёт Boeing 747-329SF. Гэта транспартны борт, які належыць авіякампаніі "Трансавіяэкспарт".
"Эксплуатацыя паветранага судна дазволіць задаволіць патрэбы ў грузавых авіяцыйных перавозках прамысловых прадпрыемстваў нашай краіны, у тым ліку ажыццявіць транскантынентальныя чартарныя рэйсы", — адзначылі ў міністэрстве.
Са снежня 2021 года "Трансавіяэкспарт" і два яго самалёты знаходзяцца ў санкцыйным спісе ЗША. Праз уварванне Расіі ва Украіну за "істотнае садзейнічанне і падтрымку Беларуссю ўварвання Расіі ва Украіну" гэтая авіякампанія ўнесеная таксама ў санкцыйныя спісы шэрагу іншых краін. Дзе самы вялікі беларускі самалёт праходзіў тэхабслугоўванне і ці былі якія-небудзь складанасці з прычыны ўведзеных санкцый, у Мінтранспарту не ўдакладнілі.
