У Мінскім раёне самалёт раскідае брыкеты з вакцынай ад шаленства
Вакцына ад шаленства / vk.com
У Мінскім раёне самалёт раскідае брыкеты з вакцынай ад шаленства. Акцыя па імунізацыі дзікіх жывёл стартуе 15 кастрычніка, паведамляе газета "Прысталічча".
У Мінскай раённай ветстанцыі папярэджваюць, што людзям неабходна пазбягаць знаходжання ў зоне палёту самалёта, "каб пазбегнуць траўміравання падаючымі прынадамі". Іх забараняецца браць рукамі. Пры выпадковым трапленні вакцыны з брыкета-прынады на адкрытыя ўчасткі цела і твару, неабходна прамыць іх вадой, апрацаваць 2% растворам пітной соды і звярнуцца ва ўстанову аховы здароўя.
Падобныя акцыі праводзяцца рэгулярна. Мінулай восенню брыкеты з капсуламі для дзікіх жывёл раскідалі на тэрыторыі чатырох абласцей — Гродзенскай, Мінскай, Брэсцкай і Віцебскай. Сёлета вясной вакцыну распаўсюдзілі ўздоўж мяжы з Літвой і Латвіяй.
